Muqdisho (Dawan) – Wasaaradda Beeraha iyo Waraabka Soomaaliya ayaa sheegtay inay ka guddoontay Hay’adda Iskaashiga iyo Horumarinta Turkiga (TIKA) qalab xafiiseed iyo agab elektaroonig ah oo loogu talagalay horumarinta iyo casriyeynta howlaha wasaaradda.
Wasiirka Beeraha iyo Waraabka Soomaaliya, Maxamed Cabdi Xayir Maareeye, ayaa qalabka si rasmi ah ugala wareegay Madaxa TIKA ee Soomaaliya, Zafer Eski, munaasabad ka dhacday magaalada Muqdisho, sida lagu sheegay war-saxaafadeed ay soo saartay wasaaraddu.
Qalabka la wareejiyay ayaa isugu jira agab xafiiseed, kumbiyuutarro iyo shaashado waaweyn, kuwaas oo lagu qalabeyn doono xarunta cusub ee Wasaaradda Beeraha iyo Waraabka.
Wasaaraddu waxay sheegtay in qalabkan uu gacan ka geysan doono kor u qaadista hufnaanta maamulka, dardargelinta adeegyada iyo taageeridda qorshayaasha horumarineed ee waaxda beeraha.
