Turkiga (Dawan)– Wasaaradda Gaashaandhigga ee Turkiga ayaa maanta oo Khamiis ah si rasmi ah u beenisay wararka sheegaya in nidaamka difaaca gantaalaha ee S-400 ee Ruushku sameeyay in la geeyay Soomaaliya.
Afhayeenka wasaaradda, Zeki Aktürk, ayaa ku sheegay shir jaraa’id in inkastoo Ankara ay si firfircoon u taageerto ciidanka Soomaaliya iyo amniga badda, haddana nidaamyada S-400 ay weli ku sugan yihiin gudaha Turkiga.
Aktürk ayaa caddeeyay in nidaamyada S-400 lagu helay si waafaqsan baahiyaha hawlgalka ee Ciidamada Qalabka Sida ee Turkiga, islamarkaana aysan jirin qorshe ku saabsan in lagu adeegsado Soomaaliya.
"Sida horeba loo sheegay, nidaamyada difaaca hawada ee S-400 waxaa lagu helay si waafaqsan baahiyaha hawlgalka ee Ciidamada Qalabka Sida ee Turkiya, haddana waxay ku jiraan xaalad diyaargarow ah," Aktürk ayaa sidaas yiri. "Ma jirto wax qorshe ah oo ku saabsan adeegsiga nidaamyada difaaca hawada ee S-400 ee gudaha Soomaaliya." Ayuu hadalkiisa raaciyay.
Waxa uu sidoo kale carrabka ku adkeeyay in taageerada Ankara ee Soomaaliya ay ku jirto qaab-dhismeedka heshiisyada la saxiixay ee loogu talagalay kobcinta awoodda milatari iyo ilaalinta kheyraadka dhaqaalaha.
