Turkiga oo qorsheynaya inuu Soomaaliya ka tuuro gantaalladiisa

Wasiirku wuxuu sheegay in goobta ay Soomaaliya kaga taallo dhulbaraha ay xarunta siin doonto faa’iidooyin ay ka mid yihiin dhimista kharashaadka hawada sare lagu gaaro iyo kordhinta fursadaha ridista gantaallada iyo tijaabooyinka, maadaama isu-socodka hawlgallada hawada sare ee gobolka uu ka ciriiri yar yahay meelo kale.Kacır ayaa helitaanka awood madax-bannaan oo hawada sare lagu gaaro ku tilmaamay mid ka mid ah yoolalka istaraatiijiga ah ee ugu muhiimsan Turkiga, isaga oo sheegay in dalku u baahan yahay xarun u gaar ah iyo awood uu ku horumariyo kuna soo saaro gaadiidka hawada sare isaga oo adeegsanaya farsamooyin gudaha laga sameeyo. Wuxuu sheegay in xarunta Soomaaliya ay noqon doonto tallaabo muhiim ah oo Turkiga u fududeynaysa inuu si buuxda oo madax-bannaan hawada sare ku gaaro.

Hadallada wasiirka ayaa daba socda ku dhawaaqistii horraantii toddobaadkan ee Madaxweyne Recep Tayyip Erdoğan, kaas oo sheegay in dhismaha xarunta hawada sare ee Soomaaliya uu socdo. Erdoğan ayaa sheegay in mashruucu xoojin doono awoodda Turkiga ee hawada sare, isla markaana uu gacan ka geysan doono horumarinta qaybta hawada sare ee Afrika.

Mashruucu wuxuu qayb ka yahay Barnaamijka Qaran ee Hawada Sare ee Turkiga, kaas oo lagu doonayo in lagu ballaariyo teknoolojiyadda hawada sare iyo awoodda dalka ee ridista gantaallada. Wasiirku ma uusan sheegin noocyada gaarka ah ee gantaallada laga tuuri doono xarunta ama waqtiga la filayo in dhismaheeda la dhammaystiro.