Muqdisho (Dawan)– Hawlgalka Kaalmaynta Ku-meel-gaarka ah ee Qaramada Midoobay ee Soomaaliya (UNTMIS) ayaa soo gabagabeeyay qaybtii taageerada uu siinayay hay’adaha cadaaladda iyo adeegyada xabsiyada Soomaaliya, sida ay sheegtay Wasaaradda Cadaaladda iyo Arrimaha Dastuurka Xukuumadda Federaalka Soomaaliya.
Kulanka lagu soo xirayay hawlaha taageerada waxaa ka qayb galay Wasiirka Cadaaladda iyo Arrimaha Dastuurka Xasan Macallin Maxamuud, mas’uuliyiin ka tirsan Dowladda Federaalka iyo Dowlad Goboleedyada, wakiillo ka socday Qaramada Midoobay iyo UNTMIS, hay’adaha cadaaladda iyo asluubta, iyo bah-wadaagta taageerta Soomaaliya.
Wasiir Xasan Macallin Maxamuud ayaa uga mahadceliyay Qaramada Midoobay, UNTMIS iyo bah-wadaagta kale taageeradii ay ka geysteen horumarinta hay’adaha cadaaladda, adeegyada xabsiyada, dhismaha awoodda hay’adaha iyo xoojinta ku dhaqanka sarreynta sharciga.
UNTMIS waxaa la aas-aasay sanadkii 2024, kadib markii Golaha Ammaanka ee Qaramada Midoobay uu ansixiyay Qaraarka 2753 (2024), kaas oo lagu beddelay Hawlgalkii Qaramada Midoobay ee Soomaaliya (UNSOM). Hawlgalkan cusub ayaa loo xilsaaray taageeridda Dowladda Soomaaliya inta lagu guda jiro marxaladda kala-guurka, iyadoo diiradda la saarayo xoojinta hay’adaha qaranka iyo wareejinta mas’uuliyadaha hay’adaha Soomaaliyeed.