Xamse iyo madaxda ururrada oo qiimeynaya doorashadii Muqdisho

Soomaaliya, Febraayo 26, 2026 (Dawan)— Ra’iisul Wasaaraha Xamse Cabdi Barre ayaa maanta oo Khamiis ah wadahadallo la yeeshay madaxda ururrada siyaasadeed ee ka qaybgalay doorashadii goleyaasha deegaanka ee dhamaadii bishii December ka dhacday gobolka Banaadir, sida uu sheegay xafiiska Ra’iisul Wasaaraha.

Kulankan ayaa ujeeddadiisu ahayd dhageysiga talooyinka ururrada siyaasadeed ee ku saabsan nidaamka doorashada “qof iyo cod” kaddib markii laga hirgeliyay caasimadda Muqdisho ee Soomaaliya.

Xafiiska Ra’iisul Wasaaraha ayaa sheegay in hoggaanka ururrada laga dhageystay aragtiyo iyo talooyin wax-ku-ool ah oo ku saabsan horumarinta nidaamka doorashooyinka dadweynaha, xoojinta dimuqraadiyadda, iyo ka-qaybgalka bulshada ee arrimaha siyaasadda.

“Ra’iisul Wasaaruhu wuxuu tilmaamay in xukuumaddu ay ka go’an tahay dhageysiga dhammaan daneeyayaasha siyaasadda dalka si loo helo aragti mideysan oo lagu wajahayo amniga dalka, arrimaha doorashooyinka, iyo hannaanka dowlad-dhiska,” ayaa lagu yiri bayaanka xafiiska.

Dowladda federaalka ayaa hadda u dhaqaaqaysa sidii loo soo gabagabeyn lahaa doorashooyinka tooska ah ee dowladaha hoose ee degmooyin hor leh oo dalka oo dhan ah.

Doorashooyinka dowladaha hoose ee Banaadir oo dhacay dhammaadkii 2025 waxaa ka qayb galay 20 urur siyaasadeed. In kasta oo dowladdu ay natiijada u adeegsanayso sidii loo gaarsiin lahaa nidaamka qof iyo cod dalka oo dhan, haddana geeddi-socodku wuxuu diidmo kala kulmayaa kooxaha mucaaradka ah iyo qaar ka mid ah dowlad-goboleedyada.