Xamse oo shuruud ku xiray qaabilaadda dadka laga soo celinayo Yurub

Muqdisho (Dawan)– Ra’iisul Wasaaraha Jamhuuriyadda Federaalka Soomaaliya, Xamse Cabdi Barre, ayaa sheegay in dowladda federaalku ay diyaar u tahay inay dib u qaabisho muwaadiniinteeda laga soo celinayo dalalka Yurub, hase yeeshee wuxuu shuruud uga dhigay in marka hore si rasmi ah loo xaqiijiyo aqoonsigooda iyo jinsiyaddooda.

Ra’iisul Wasaaraha ayaa hadalkan ka jeediyay munaasabadda daah-furka Xarunta Qurbo-joogta Soomaaliyeed, isagoo ka hadlay go’aankii Golaha Midowga Yurub ee lagu adkeeyay habraacyada bixinta fiisooyinka muwaadiniinta Soomaaliyeed.

Xamse Cabdi Barre ayaa sheegay in dowladda Soomaaliya aysan marnaba diidin dib u qaabilaadda muwaadiniinteeda, balse ay muhiim tahay in geeddi-socodkaasi uu noqdo mid waafaqsan sharciga, isla markaana la hubiyo in dadka la soo celinayo ay yihiin muwaadiniin Soomaaliyeed.

“Dadkeennu dalkooda ayay leeyihiin, qof u diidi kara ma jiro. Laakiin waxaan u baahanahay in dadkeennu helaan xuquuqdooda, isla markaana habka loo soo celinayo uu noqdo mid lagu qanci karo,” ayuu yiri Ra’iisul Wasaaruhu.

Wuxuu sheegay in mowqifka dowladda Soomaaliya uu yahay kii uu hore u shaaciyay Madaxweynaha Jamhuuriyadda Federaalka Soomaaliya, Xasan Sheekh Maxamuud, kaas oo ku saleysan in dib u soo celinta muwaadiniinta ay ku xirnaato xaqiijinta aqoonsigooda.

Ra’iisul Wasaaruhu wuxuu xusay in dowladda Soomaaliya ay Midowga Yurub u caddeysay mowqifkeeda, isagoo sheegay inuusan jirin sabab lagu sii adkeeyo habraacyada fiisooyinka ee lagu dabaqayo muwaadiniinta Soomaaliyeed.

Dhanka kale, Xamse Cabdi Barre ayaa uga mahadceliyay dalalka martigeliyay qaxootiga iyo muhaajiriinta Soomaaliyeed, isagoo sheegay in qurbo-joogta Soomaaliyeed ay door muuqda ku leeyihiin horumarka dalalka ay ku nool yihiin.

“Dadkeennu meel kasta oo ay tagaan faa'iido ayay u leeyihiin, khasaare kuma aha. Waxay maalgashadaan, ganacsi sameeyaan, canshuurna way bixiyaan,” ayuu yiri.

26-kii Juun, Madaxweynaha Soomaaliya Xasan Sheekh Maxamuud ayaa sidoo kale sheegay in Soomaaliya ay diyaar u tahay inay dib u qaabisho muwaadiniinteeda aan haysan sharciyadda joogitaanka dalalka Yurub, iyadoo la raacayo hab waafaqsan sharciga iyo xaqiijinta aqoonsigooda.

Hadalka Ra’iisul Wasaaraha ayaa ku soo beegmaya kadib markii Golaha Midowga Yurub uu ku dhawaaqay in la adkeeyay habraacyada bixinta fiisooyinka muwaadiniinta Soomaaliyeed, kaddib qiimeyn ay sameysay Guddiga Midowga Yurub oo lagu sheegay in heerka wada-shaqeynta Soomaaliya ee dib u qaabilaadda muwaadiniinteeda uusan weli gaarsiisnayn heer lagu qanco.