Muqdisho (Dawan) — Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa ugu baaqay shacabka Soomaaliyeed ee ku kala nool gobollada dalka, dhalinyarada iyo ciidamada qalabka sida inay u midoobaan difaaca qaranka, isaga oo ka digay in kala-qaybsanaanta gudaha ay dalka u nuglayn karto faragelin shisheeye.
Khudbad muuqaal ah oo uu galabnimadii Talaadada u jeediyay shacabka Soomaaliyeed, taas oo uu ku eedeeyay Imaaraadka Carabta inay wiiqayso midnimada Soomaaliya, ayuu madaxweynuhu ku sheegay in kala-qaybsanaantu tahay khatarta ugu weyn ee dalka haysata. "Cadowga ugu weyn ma aha kan dibadda ka yimaada, cadowga ugu weyn waa kala-qaybsanaanteenna," ayuu yiri Xasan Sheekh.
Madaxweynuhu wuxuu shacabka ugu baaqay inaysan oggolaan wax kasta oo kala qaybinaya, kala fogeynaya, isla markaana u nuglaynaya cid kasta oo doonaysa inay dalka dhibaateyso. Isaga oo la hadlayay shacabka Soomaaliyeed ee ku nool Somaliland, Puntland iyo Jubbaland, ayuu sheegay in khilaafaadka siyaasadeed lagu xallin karo wada-hadal ay Soomaalidu dhexdooda ku yeeshaan, halkii lagu raadin lahaa faragelin shisheeye.
"Walaalaha Soomaaliyeed ee ku dhaqan Somaliland, Puntland iyo Jubbaland, idinku waxaad tihiin oo aad ka tirsan tihiin qaranka Soomaaliyeed. Khilaafaadkeenna siyaasadeed waxaan ku xallin karnaa, kuna xallin doonnaa, haddii Alle idmo, miiska wada-hadalka Soomaaliyeed, ee kuma xallin doonno faragelin iyo gacmo shisheeye," ayuu yiri madaxweynuhu.
Isaga oo dhallinyarada Soomaaliyeed la hadlayay, ayuu ku tilmaamay inay yihiin kuwa ilaaliya mustaqbalka ummadda, isaga oo ugu baaqay inaysan ku kadsoomin lacag, ballanqaadyo been ah ama qorshayaal uu ku tilmaamay kuwo dibindaabyo xambaarsan. "Dhalinyaro, idinku waxaad tihiin kuwa ilaaliya, ilaalin doonana mustaqbalka ummaddeena. Ma tihidin kuwa lagu iibsan karo lacago yar-yar, ballanqaadyo been-abuur ah ama qorshayaal dibindaabyo wata," ayuu yiri.