Xilliga la qabanayo tartanka kubadda cagta ee D/Goboleedyada iyo Banaadir oo la shaaciyay

Muqdisho. 11 December, 2025 (Dawan)- Xiriirka Kubadda Cagta Soomaaliya (SFF) ayaa ku dhawaaqay in tartanka kubadda cagta ee Dowlad Goboleedyada iyo Gobolka Banaadir uu bilaaban doono 24ka Janaayo 2026, kadib hal sano oo hakad ah.

Guddoomiyaha Xiriirka, Cali Cabdi Maxamed (Cali Shiine), oo shir jaraa’id qabtay ayaa sheegay in isku-aadka tartanka la qaban doono 22ka December 2025, isla markaana Xiriirku uu mas’uul ka yahay qabanqaabada iyo maamulida tartanka.

“Tartanku wuxuu bilaabanayaa 24ka Janaayo 2026, halka isku-aadkana uu dhici doono 22ka December 2025,” ayuu yiri Cali Shiine.

Wuxuu ugu baaqay Dowlad Goboleedyada iyo maamulka Gobolka Banaadir inay xoojiyaan taageerada horumarinta kubadda cagta, oo ay ku jiraan tababarka ciyaartoyda, bixinta qalabka, iyo hagaajinta goobaha ciyaaraha. Cali Shiine ayaa intaa ku daray in kubadda cagtu ay tahay mid mideysa bulshada loona baahan yahay in laga fogeeyo khilaafaadka siyaasadeed.

Xiriirka Kubadda Cagta Soomaaliya ayaa xaqiijiyay in tartanka la qaban doono sanad kasta, iyadoo habka marti-gelintu uu noqon doono mid wareeg ah oo lagu qaban doono magaalooyinka Dowlad Goboleedyada sanad walba. “Waxaan dejin doonaa jadwal go’an, sanad walbana waa la qaban doonaa, maamuladuna midba mar ayuu marti-gelin doonaa,” ayuu yiri, Guddoomiye Shiine

Tartankii ugu dambeeyay ayaa dhacay Janaayo 2024, markaas oo ay Galmudug ku guuleysatay , inkasta oo xiisado siyaasadeed iyo carqalado akle ay saameeeyeen tartanka Puntland kama qaybgalin tartankaas, halka Dowlad Goboleedka Waqooyi-bari la filayo inay ka qayb gasho tartanka 2026 markii ugu horreysay.