Xilliga la soo gabagabeynayo doodda Dastuurka oo la shaaciyay

Muqdisho (Dawan)– Guddoomiyaha Golaha Shacabka ee Baarlamaanka Soomaaliya, Sheekh Aadan Maxamed Nuur (Madoobe), ayaa shaaciyay in la qorsheynayo in kahor 15-ka bisha Ramadaan la soo gabagabeeyo doodda iyo ka shaqeynta cutubyada harsan ee Dastuurka Kumeelgaarka ah.

Guddoomiyaha, oo shir guddoominayay kulanka wadajirka ah ee labada Aqal ee Baarlamaanka, ayaa sheegay in xilligan hortooda yaallaan cutubyada 10-aad, 11-aad iyo 12-aad ee Dastuurka, kuwaas oo ay soo gudbisay Guddiga Madaxa-bannaan ee Dib-u-eegista Dastuurka.

Cutubyada la horkeenay Baarlamaanka ayaa kala ah:

* Cutubka 10-aad: Shaqaalaha Rayidka ee Dowladda

* Cutubka 11-aad: Nidaamka Maaliyadda Guud

* Cutubka 12-aad: Difaaca iyo Amniga Qaranka

Guddoomiyaha Golaha Shacabka ayaa xusay in haddii dadaal dheeri ah la sameeyo maalmaha soo socda ay suurtagal tahay in lagu guuleysto dhameystirka cutubyadan kahor 15-ka Ramadaan, kaddibna si wadajir ah loo ansixiyo.

“Haddii maanta iyo berri aan dadaal dheeri ah sameyno, waxaan ku guuleysan karnaa in muddadii aan sugaynay — kahor 15-ka Soon — aan soo afjarno. Xildhibaanno badan oo dibadda ku maqnaa way noo yimaadeen,” ayuu yiri Guddoomiye Aadan Madoobe.

Soo gudbinta saddexdan cutub waxay ka dhigan tahay in Baarlamaanka Federaalka uu haatan gacanta ku hayo ka shaqeynta 13 cutub oo ka tirsan Dastuurka dalka. Doodda ku saabsan wax-ka-beddelka iyo dib-u-eegista cutubyadan ayaa si rasmi ah u bilaabatay 7-dii bishan Febraayo, iyadoo muddadaas ay xildhibaannadu ka doodayeen qodobbada la soo jeediyay in wax laga beddelo.

Dhammeystirka cutubyada harsan ee Dastuurka ayay xukuumaddu aragtaa tallaabo muhiim ah oo horumar u ah geeddi-socodka dib-u-habaynta iyo dhameystirka Dastuurka Kumeelgaarka ah ee dalka, halka ay jirto diidmo ka imaaneysa mucaaradka iyo dowlad goboleedyada Puntland iyo Jubbaland