Muqdisho (Dawan) – Midowga Yurub ayaa maanta ugu baaqay hoggaamiyeyaasha siyaasadda Soomaaliya inay si degdeg ah dib u billaabaan wada-hadalka lagu xallinayo arrimaha doorashooyinka dalka, iyadoo xaalada siyaasadeed ee dalka ay weli kacsan tahay isla markaana ay jiraan khilaafaad u dhexeeya Dowladda Federaalka, mucaaradka, iyo qaar ka mid ah dowlad-goboleedyada xubnaha ka ah federaalka.
Safiirka Midowga Yurub ee Soomaaliya, Francesca Di Mauro, ayaa Dawan u sheegtay in Brussels ay la xiriirto dhammaan dhinacyada siyaasadda, iyadoo wada-hadalka loo arko dariiqa ugu muhiimsan ee lagu xalin karo khilaafaadka siyaasadeed.
“Annagu ma taageerno dhinac ka mid ah dhinacyada, waxaannu dhiirrigelinaynaa wada-hadal,” ayay tiri Safiirka, iyadoo intaa ku dartay in Midowga Yurub uu rumaysan yahay in khilaafaadka siyaasadeed lagu xallin karo wada-tashi ay kasoo baxaan natiijooyin muuqda.
Safiirka ayaa intaa ku dartay in wadahadallada u dhexeeya Dowladda Federaalka, hoggaamiyeyaasha mucaaradka iyo qaar ka mid ah Dowlad-goboleedyada xubnaha ka ah ay horey uga bilaabmeen Soomaaliya bishii September 2025, isla markaana doorka Yurub uu ahaa in la ilaaliyo xiriirka iyo wacyigelinta dhammaan dhinacyada.
