Muqdisho (Dawan) – Ciidanka Booliska Soomaaliyeed ayaa soo bandhigay 10 qof oo ay sheegeen in lagu soo qabtay howlgal ay si wadajir ah u fuliyeen Ciidanka Dambi-baarista (CID) iyo bulshada, kuwaas oo lagu eedeeyay inay baraha bulshada ku faafinayeen waxyaabo ay boolisku ku tilmaameen anshax-xumo iyo dhaqan ka hor imanaya qiyamka bulshada Soomaaliyeed.
Afhayeenka Ciidanka Booliska Soomaaliyeed, Cabdifitaax Aadan Xasan, ayaa sheegay in dadka la soo qabtay loo haysto faafinta muuqaallo iyo waxyaabo uu ku tilmaamay “dhaqanka qowmuluudka” iyo falal kale oo uu sheegay inay dhaawacayaan anshaxa bulshada.
“Taliska Ciidanka Booliska wuxuu gacanta ku soo dhigay 10 eedeysane oo ka mid ah dadka baraha bulshada ku faafinayay waxyaabo lid ku ah dhaqanka iyo anshaxa bulshada Soomaaliyeed,” ayuu yiri afhayeenku.
Afhayeenku wuxuu sidoo kale sheegay in intii howlgalka lagu jiray ay ku dhaawacmeen xubno ka tirsan laamaha ammaanka, inkastoo uusan faahfaahin ka bixin xaaladdooda.
