New York (Dawan)- Konton iyo afar dal, dad ka badan hal bilyan iyo bar, iyo qaarad ay ka dhacaan inta badan arrimaha uu Golaha Ammaanka ka doodo—haddana Afrika hal kursi oo joogto ah kuma laha Golaha lagu gaaro go’aannada ugu culus ee dunida.
Khudbadihii madaxda Afrika ay ka jeediyeen kalfadhiga 81-aad ee Golaha Guud ee Qaramada Midoobay, hal dalab ayaa si weyn uga dhex muuqday: in la saxo waxa ay ku tilmaameen caddaalad-darrada taariikhiga ah ee Afrika looga reebay xubnaha joogtada ah ee Golaha Ammaanka.
Madaxda africaanka ah ayaa si wayn uga hadlay qodobkaan isaga oo u muuqday in uu ahaa u jeedada ugu wayn ee sanadkaan ay shirka ka doonayeen.
Markii Qaramada Midoobay la dhisay 1945-kii, Mareykanka, Midowgii Soofiyeeti, Ingiriiska, Faransiiska iyo Shiinaha waxaa loo aqoonsaday quwadihii ugu waaweynaa ee ka soo baxay Dagaalkii Labaad ee Adduunka. Waxaa la siiyay xubinnimo joogto ah iyo awoodda diidmada qayaxan oo loo yaqaan "veto".
Kursigii Midowgii Soofiyeeti waxaa 1991-kii la wareegtay Ruushka. Kursiga Shiinahana waxaa markii hore hayay dowladda Jamhuuriyadda Shiinaha ee Taiwan, balse 1971-kii waxaa loo wareejiyay Jamhuuriyadda Shacabka Shiinaha.
