Antalya (Dawan) – Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa ka mid ah hoggaamiyeyaasha caalamka ee ka qaybgalaya Shirweynaha COP31 oo 9-kii Nofeembar ka furmay magaalada Antalya ee dalka Turkiga, kaas oo la qorsheeyay inuu socdo illaa 20-ka Nofeembar 2026.
Madaxweynaha ayaa la filayaa inuu khudbad ka jeediyo shir-madaxeed qayb ka ah shirweynaha COP31, isaga oo diiradda saari doona saameynta isbeddelka cimiladu ku leeyahay Soomaaliya, dadaallada dowladda ee wax looga qabanayo caqabadaha deegaanka iyo baahida loo qabo taageero iyo iskaashi caalami ah.
Sida uu baahiyay Telefishinka Qaranka Soomaaliyeed, Madaxweynaha ayaa madasha ku soo bandhigi doona qorshayaasha qaranka ee lagu xoojinayo u diyaargarowga iyo u adkaysiga saameynta taban ee isbeddelka cimilada. Qorshayaashaas waxaa ka mid ah horumarinta ilaha tamarta cagaaran, la dagaallanka nabaad-guurka, ilaalinta deegaanka iyo kobcinta awoodda bulshada ee la qabsiga xaaladaha cimilo ee isbeddelaya.
Jadwalka shirweynaha ayaa dhigaya in Madaxweyne Xasan Sheekh Maxamuud iyo hoggaamiyeyaasha kale ee lagu casuumay ay khudbado ka jeediyaan madasha, isla markaana ka qaybgalaan kulamo heer sare ah oo qabsoomi doona 11-ka iyo 12-ka Nofeembar.
Mid ka mid ah waxyaabaha muhiimka ah ee Soomaaliya ku yeelanayso COP31 ayaa ah Ardaaga Qaranka Soomaaliya (Somalia Pavilion), kaas oo Wasaaradda Deegaanka iyo Isbeddelka Cimiladu hore u shaacisay in la hirgelin doono muddada uu shirku socdo.