Jabuuti oo bilowday olole lagu buufinayo guryaha si looga hortago duumada

Wasiirka Caafimaadka, Muna Cusmaan, ayaa sheegtay in ololahani uu qayb ka yahay siyaasadda wasaaradda ee la dagaallanka cudurrada ay kaneecadu gudbiso. Waxay sidoo kale bulshada ugu baaqday inay door muuqda ka qaataan dadaallada lagu xakameynayo duumada, si mustaqbalka dalka looga ciribtiro cudurka.

Muna Cusmaan ayaa sheegtay in tirada dadka uu cudurka duumadu ku dhacay sannadkii 2020 ay gaareysay 73,000 oo qof, halka ay hadda hoos ugu dhacday 17,000 oo qof. Waxay hoos u dhacaas ku tilmaantay natiijada dadaallo caafimaad oo muddo dheer socday. Waxay intaas ku dartay in dadaalladaasi ay horseedeen hoos u dhac weyn oo ku yimid faafitaanka cudurka, iyadoo xustay in horumar la taaban karo laga sameeyay la dagaallanka duumada ee dalka Jabuuti.

Ololahan ayaa qayb ka ah dadaallada dowladda Jabuuti ay ku xoojinayso ka hortagga duumada, iyadoo mudnaanta la siinayo xakamaynta kaneecada iyo wacyigelinta bulshada, si loo sii yareeyo kiisaska cudurka loona gaaro yoolka ah in dalka laga ciribtiro duumada.