Afar qof oo la xiray ka hor dibadbaxyada Muqdisho

Soomaaliya (Dawan)— Booliska Soomaaliya ayaa Khamiistii sheegay inay magaalada Muqdisho ku xireen afar qof oo lagu eedeeyay inay ku lug lahaayeen dhaqdhaqaaqyo ay ku tilmaameen inay khatar ku yihiin nabadgelyada iyo xasiloonida caasimadda, maalmo yar kahor dibadbaxyo ay qorsheeyeen mucaaradku.

War qoraal ah oo ka soo baxay Taliska Booliska Gobolka Banaadir ayaa lagu sheegay in dadka la xiray ay yihiin:

Cabdixakiin Maxyadiin Sheekh Cali

Muscab Mire Indhayare

Cabdixamiid Cabdikariin Xuseen

Xamdi Cabdi Caddoow

Booliska ayaa sheegay in dadkan loo haysto ka qaybgalka dhaqdhaqaaqyo abaabulan oo khatar ku ah amniga dadweynaha ee Muqdisho.

Taliska Booliska ayaa intaas ku daray in ay socdaan baaritaanno hordhac ah, isla markaana dadka la xiray loo gudbin doono hay’adaha garsoorka si looga qaado tallaabooyinka sharciga ah ee ku habboon.

“Qof kasta oo ku lug yeesha falal ka dhan ah amniga iyo xasiloonida bulshada wuxuu wajihi doonaa tallaabo adag oo waafaqsan sharciga,” ayaa lagu yiri qoraalka.

Xariggan ayaa kusoo beegmaya xilli ay jirto xiisad siyaasadeed oo ka dhalatay dibadbaxyo ay mucaaradku qorsheeyeen inay Muqdisho ku qabtaan 10-ka May, iyo wadahadallo la filayo inay dhexmaraan dowladda federaalka iyo xubnaha mucaaradka.