Muqdisho (Dawan) – Taliska Ciidamada Mareykanka ee Afrika (AFRICOM) ayaa sheegay in kororka duqeymaha cirka ee laga fuliyay Soomaaliya sannadka 2026 uu ka tarjumayo culeyska sii kordhaya ee lagu hayo kooxaha Daacish iyo Al-Shabaab, iyadoo Ciidanka Xoogga Dalka Soomaaliyeed ay dardargeliyeen howlgallada dhulka ee ka dhanka ah labada kooxood.
Hadalkan ayaa yimid kaddib su’aal ay warbaahinta Dawn Media ku weydiisay shir jaraa’id oo khadka internetka lagu qabtay, kaas oo AFRICOM ay uga warbixinaysay xaaladda amniga iyo howlgallada militari ee ay ka waddo qaaradda Afrika. Su’aashu waxay ku saabsaneyd in kororka weyn ee duqeymaha sannadkan uu ka dhashay xaalad amni oo sii xumaaneysa, mise uu yahay isbeddel ku yimid istiraatiijiyadda militari.
Taliyaha AFRICOM, General Michael Anderson, ayaa sheegay in kororka howlgallada sannadkan uu salka ku hayo laba arrimood oo waaweyn: dhaqdhaqaaqa joogtada ah ee kooxaha hubeysan iyo dardarta howlgallada ay ciidamada Soomaaliyeed ka wadaan gudaha dalka.
Anderson ayaa sheegay in ciidamada Soomaaliyeed, gaar ahaan kuwa ka howlgalaya Puntland, ay culeys xooggan saareen kooxda Daacish, taasoo sababtay in xubnaheeda lagu koobo deegaanno aad u xaddidan.
Waxa uu xusay in kooxda ay lumisay xorriyaddii dhaqdhaqaaqa, ayna go’een marinadii sahayda, isla markaana ay daciiftay awooddii isku xirka iyo isgaarsiinta.
Sida uu sheegay, guulaha ciidamada Soomaaliyeed ayaa AFRICOM u abuuray fursado ay ku fuliso duqeymo sax ah oo lagu bartilmaameedsanayo saldhigyada iyo xarumaha kooxda.
