Qaahira (Dawan) – Siddeed badmaax oo Masaari ah oo lagu afduubtay markabka M/T Eureka ayaa la sii daayay kaddib bilo ay ku jireen gacanta koox burcad-badeed ah, sida ay sheegtay Wasaaradda Arrimaha Dibadda Masar.
Badmaaxiyiinta ayaa la afduubtay 2-dii May, xilli markabku ku sugnaa meel ka baxsan xeebaha Puntland ee Soomaaliya, waxaana sii deyntooda lagu dhawaaqay kaddib dadaallo diblomaasiyadeed oo ay Masar sheegtay inay wadday.
Wasaaradda Arrimaha Dibadda Masar ayaa sheegtay in sii deyntooda ay timid kaddib tilmaamo uu bixiyay Madaxweynaha Masar Abdel Fattah al-Sisi iyo dadaallo uu hoggaaminayay Wasiirka Arrimaha Dibadda iyo Iskaashiga Caalamiga ah, Badr Abdelatty.
Wasaaraddu waxay sheegtay in Abdelatty uu xiriirro heer sare ah la sameeyay mas’uuliyiinta Soomaaliya iyo Yemen, isagoo kala hadlayay sidii loo xaqiijin lahaa sii deynta badmaaxyada.
Afhayeenka Wasaaradda Arrimaha Dibadda Masar, safiir Nader Zaki, ayaa sheegay in wasiirku usheegay safaaradda Masar ee Muqdisho inay soo dhaweyso badmaaxyada, hubiso xaaladdooda, isla markaana fududeyso inay Masar ugu laabtaan duulimaadka ugu horreeya ee la heli karo.
