Muqdisho (Dawan) – Qaar ka mid ah beeraleyda gobolka Shabeellaha Hoose ayaa Dowladda Federaalka Soomaaliya u gudbiyey cabashooyin la xiriira dhibaatooyinka ay Al-Shabaab ku hayaan deegaannadooda iyo waxyeellooyin ay sheegeen inay kasoo gaareen howlgalladii ugu dambeeyey ee gobolka ka dhacay.
Beeraleydu waxay cabashooyinkooda la wadaageen Wasiirka Beeraha iyo Waraabka Xukuumadda Federaalka Soomaaliya, Maxamed Cabdi Xayir Maareeye; Wasiiru Dowlaha Wasaaradda Gaashaandhigga, Cumar Cali Cabdi; iyo Taliyaha Ciidanka Dhulka ee Ciidanka Xoogga Dalka Soomaaliyeed, Sareeye Guuto Sahal Cabdullaahi Cumar.
Intii uu kulanku socday, beeraleydu waxay faahfaahin ka bixiyeen caqabadaha amni ee saameeyey noloshooda iyo wax-soo-saarka beeraha. Waxay sheegeen in Al-Shabaab ay dhibaatooyin joogto ah ku hayaan deegaannada beeraha, iyagoo sidoo kale tilmaamay inay waxyeello kasoo gaartay qaar ka mid ah howlgalladii ugu dambeeyey ee ciidamada dowladda ay ka fuliyeen gobolka.
