Muqdisho (Dawan ) – Hawlgalka Kumeelgaarka ah ee Qaramada Midoobay ee Soomaaliya (UNTMIS) ayaa soo dhoweeyay casuumaadda Dowladda Federaalka Soomaaliya ee Golaha Mustaqbalka Soomaaliyeed, isaga oo ku baaqay wada-hadal loo dhan yahay si xal loogu helo arrimaha mudnaanta leh ee qaranka.
Bayaan uu xafiiska UNTMIS ku baahiyay barta X maanta oo Axad ah , ayaa lagu sheegay in kulankaas uu gacan ka geysan karo sidii dhinacyada ay “wadajir ugu heli lahaayeen waddo lagu wajahayo mudnaanta qaranka.”
Hawlgalku waxa uu ugu baaqay dhammaan dhinacyada inay si wax ku ool ah oo niyad wanaagsan leh uga qeyb qaataan wada-hadallada, iyadoo adkaysay in danaha shacabka Soomaaliyeed ay noqdaan kuwa ugu horreeya.
“Waxaan dib u cusbooneysiineynaa baaqayaga ah in dhammaan dhinacyada ay si wax ku ool ah oo niyad wanaagsan leh uga qeyb qaataan wada-hadallada, iyadoo danaha dhammaan Soomaalida ay noqdaan mudnaanta koowaad,” ayay tiri UNTMIS.
