Hargeysa (Dawan) – Madaxweynihii hore ee Somaliland, Muuse Biixi Cabdi, ayaa ka hadlay muranka ka dhashay arrinta ictiraafka Somaliland, isagoo jawaab ka bixiyay hadallo uu sheegay in Madaxweyne Cabdiraxmaan Maxamed Cabdillaahi (Cirro) ka jeediyay shirkii Golaha Dhexe ee xisbigiisa.
Muuse Biixi ayaa qoraal uu soo saaray ku sheegay in Madaxweyne Cirro uu ku eedeeyay inuu hore u sheegay inuu “laba jeer ictiraaf ka soo helay” dalalka Guinea Conakry iyo Itoobiya. Hase yeeshee, Biixi ayaa arrintaas beeniyay, isagoo caddeeyay inuusan waligiis sheegin inuu dal ka soo helay ictiraaf rasmi ah.
“Anigu marnaba ma odhan ictiraaf ayaan dawlad la soo galay,” ayuu yiri Muuse Biixi, isagoo intaas ku daray in hadalkiisii hore si khaldan loo fasiray.
Madaxweynihii hore ayaa sidoo kale dib u xusay hadal uu hore uga jeediyay Madaxtooyada Somaliland, kaas oo uu ku sheegay in raadinta ictiraafku ay tahay mudnaanta koowaad ee Somaliland, balse loo baahan yahay in arrinta loo wajaho si taxaddar leh oo wadatashi ku dhisan, si looga fogaado khilaaf siyaasadeed oo gudaha ah.
Muuse Biixi wuxuu ku eedeeyay Madaxtooyada Somaliland inay wax ka beddeshay hadalkiisii, isagoo sheegay in laga jarjaray qaybo muhiim ah, isla markaana gebi ahaanba laga saaray hadal uu madasha ka jeediyay madaxweynihii hore ee Somaliland, Daahir Rayaale Kaahin.
