Jabuuti (Dawan) — Hay'adda Bisha Cas ee Jabuuti ayaa kaalmo lacageed siisay 168 qoys oo saqafyada guryahooda ay burbureen ama si daran ugu waxyeelloobeen kadib dabaylo bishii hore ku dhufatay magaalada Mouloud, sida ay Khamiistii sheegtay wakaaladda wararka ee dowladda ADI.
Qoys kasta ayaa helay 80,000 oo faran Jabuuti ah, oo u dhiganta ku dhowaad $449, si loogu caawiyo dayactirka ama dib-u-dhiska saqafyada guryahooda. Wadarta lacagta la bixiyay ayaa gaareysa 13.44 milyan oo faran Jabuuti ah, ama ku dhowaad $75,500, sida ay sheegtay Bisha Cas.
Dabaylaha 27-kii July ayaa waxyeello gaarsiisay guryo ku yaalla Mouloud, oo ku taalla koonfurta Jabuuti, taasoo keentay in Bisha Cas ay bilowdo gurmad dhinacyo badan leh iyadoo taageero ka heleysa Xiriirka Caalamiga ah ee Laanqayrta Cas iyo Bisha Cas, iyada oo loo marayo Sanduuqa Gurmadka Degdegga ah ee Masiibooyinka (DREF).
Kooxo ka tirsan Bisha Cas iyo mutadawiciin ayaa booqday qoysaska ay dhibaatadu saameysay si ay u qiimeeyaan khasaaraha, u ururiyaan xogta iyo xaqiijiyaan qoysaska u qalma kaalmada, sida ay wakaaladdu sheegtay.
