Muqdisho (Dawan ) – Dalladda Bulshada Rayidka Soomaaliyeed (SONSA) ayaa ku baaqday in si degdeg ah dib loogu bilaabo wadahadallada siyaasadeed, iyadoo ka digtay in khilaafka sii xoogeysanaya ee u dhexeeya Dowladda Federaalka Soomaaliya iyo Dowlad Goboleedka Koonfur Galbeed uu isu beddeli karo rabshado sii baahaya.
Baaqa ayaa ka soo baxay shir ay shalay ku yeesheen Muqdisho xubno ka tirsan bulshada rayidka, oo ay ka mid ahaayeen odayaasha dhaqanka, haweenka, iyo aqoonyahanno, kuwaas oo ka wada hadlay xaaladda siyaasadeed ee dalka iyo xiisadaha ka taagan Koonfur Galbeed.
War-saxaafadeed ay soo saartay SONSA ayaa lagu sheegay in khilaafka siyaasadeed uu horey u sababay isku dhacyo hubeysan, dhimasho, iyo barakac ku yimid shacabka, isla markaana ay jirto cabsi ah in xaaladdu kasii darto haddii aan xal degdeg ah la helin.
“Waxaan hore uga dignay in khilaafka siyaasadeed uu isu beddeli karo gacan ka hadal,” ayaa lagu yiri war-saxaafadeedka, iyadoo lagu xusay digniin hore oo dalladdu soo saartay 9-kii Maarso.
SONSA waxay sidoo kale walaac ka muujisay suurtagalnimada in ciidamada dowladda – heer federaal iyo heer dowlad goboleed – loo adeegsado khilaafka siyaasadeed, taas oo ay sheegtay inay halis ku tahay xasilloonida dalka.