Muqdisho (Dawan) – Wasiiru dowlaha Wasaaradda Arrimaha Dibadda Soomaaliya, Cali Balcad, ayaa sheegay in ololaha doorashada ee hadda ka socda Koonfur Galbeed uu muujinayo jawi siyaasadeed oo furan, tartan muuqda iyo ka-qaybgal dadweyne.
Qoraal uu ku daabacay bartiisa X (Twitter), ayuu Cali Balcad ku sheegay in farqiga u dhexeeya jawiga ololaha ee hadda ka socda Koonfur Galbeed iyo habkii siyaasadeed ee hore, kaas oo uu sheegay in mucaaradku taageersanaa xilligii madaxweyne Cabdicasiis Xasan Maxamed Laftagareen, uu yahay “habeen iyo maalin.”
“Waxa aan hadda aragno waa tartan, ka-qaybgal dadweyne iyo dardar doorasho oo dhab ah,” ayuu yiri Cali Balcad.
Wasiiru dowlaha ayaa sidoo kale sheegay in muuqaalka siyaasiyiin ay ka mid yihiin Shariif Xasan Sheekh Aadan, Aadan Maxamed Nuur Madoobe iyo Cabdicasiis Jawaari ay hoggaaminayan isu-soo-baxyo olole isla markaana u tartamaya taageerada shacabka, ay tahay arrin mudan in la xuso.