Carta (Dawan) – Dowladda Jamhuuriyadda Jabuuti iyo hay’adda Qatar Charity ayaa si rasmi ah u dhagax-dhigay mashruuc lagu dhisayo 80 guri oo bulsho, kuwaas oo loogu talagalay qoysaska nugul ee ku nool deegaanka Damiir-Joog ee bartamaha gobolka Carta.
Mashruucan ayaa qeyb ka ah siyaasadda qaran ee guryaha bulshada, oo diiradda saaraysa taageeridda qoysaska danyarta ah iyo horumarinta degsiimooyin waara.
Munaasabadda dhagax-dhigga waxaa hoggaaminaysay Wasiirka Hoyga, Magaaleynta iyo Qorsheynta, Aamina Cabdi Aadan, iyadoo ay ka qeybgaleen mas’uuliyiin ka tirsan dowladda, maamulka gobolka Carta iyo wakiillo ka socday Qatar Charity.
Mashruuca 80-ka guri ayaa ka dhashay heshiis iskaashi oo ay Wasaaradda iyo Qatar Charity kala saxiixdeen bishii Oktoobar ee sanadkii hore. Waxaa la qorsheeyay in guryahaasi noqdaan kuwo tayo leh oo ku habboon baahiyaha qoysaska aan awoodin inay helaan hoy rasmi ah.
Wasiir Aamina Cabdi Aadan ayaa sheegtay in mashruucan uu qeyb ka yahay dadaallada dowladda ee lagu xoojinayo helitaanka guryo ku habboon bulshada danyarta ah. Waxay xustay in dowladda ay hore u hirgelisay wejiyo kale oo guryeyn ah, isla markaana 80-ka guri ee cusub ay sii xoojin doonaan qorshaha ballaarinta hoyga bulshada.
