Baydhabo (Dawan) — Dagaal culus ayaa saaka ka dhacay qeybo ka mid ah magaalada Baydhabo, xarunta gobolka Baay, iyadoo dhinacyada ku lugta leh ay warar kala duwan ka bixiyeen weerarka iyo xaaladda goobaha lagu dagaallamayo.
Xasan Cabdi Maxamed, oo ah afhayeen u hadlay ciidamada taabacsan madaxweyinihii hore ee Koonfur galbeed Cabdicasiis Laftagareen, ayaa qoraal uu saaka ku daabacay Facebook ku sheegay in ciidamadoodu weerareen fariisimo ay degganaayeen ciidamada maamulka Koonfur Galbeed.
Dagaalka ayaa billowday xilligii salaadda subax, sida ay sheegeen ilo maxalli ah, waxaana magaalada laga maqlayaa rasaas culus iyo hub noocyo kala duwan ah.
Afhayeenka maamulka Koonfur Galbeed, Maxamed Sheekh Cabdullaahi (Xaayow), ayaa sheegay in Al-Shabaab ay weerar ku qaaday Baydhabo, isla markaana ciidamada dowladda iyo kuwa Koonfur Galbeed ay iska caabiyeen. Maamulka ayaa sidoo kale sheegay in ciidamo taabacsan Laftagareen ay ka qeyb qaateen weerarka, iyagoo dhinaca Al-Shabaab la dagaallamay.
Wasaaradda Gaashaandhigga Soomaaliya ayaa qoraal kooban ku sheegtay in weerarka ay si wadajir ah u soo qaadeen ciidamo taabacsan Laftagareen iyo dagaalyahanno ka tirsan Al-Shabaab, kuwaas oo ay tilmaamtay inay isku milmeen. Wasaaradda ayaa sheegtay in Ciidanku iska caabiyeen weerarka isla markaana ay gacanta ku hayaan magaalada.
Wasaaraadda ayaa intaas raacisay inay khasaaro culsu la gaarsiiyay kooxihii weerarka soo qaaday, balse faahfaahin ku saabsan tirada dhimashada ama dhaawaca ma aysan bixin.
