Baydhabo (Dawan) — Ciidamo taabacsan Madaxweynihii hore ee Dowlad Goboleedka Koonfur Galbeed, Cabdicasiis Xasan Maxamed “Laftagareen”, ayaa saakay waaberigii weerar ku qaaday magaalada Baydhabo, iyadoo dagaal uu ku dhex maray ciidamada dowladda ee ku sugan gudaha magaalada.
Wararka maxalliga ah ayaa tilmaamaya in ciidamada weerarka soo qaaday ay muddo kooban la wareegeen xaafado ka tirsan Baydhabo, balse markii dambe ay dib uga baxeen deegaannadaas, kuna laabteen fariisimihii ay hore ugu lahaayeen duleedka magaalada.
Ilaa hadda ma jiro war rasmi ah oo lagu xaqiijiyey khasaaro naf iyo maalba leh oo ka dhashay dagaalka saakay ka dhacay magaalada, iyadoo xaaladdu weli tahay mid kacsan.
Magaalada Baydhabo ayaa maanta lagu waday in lagu dhaariyo xildhibaannada cusub ee Dowlad Goboleedka Koonfur Galbeed, kuwaas oo dhawaan ku soo baxay doorasho qof iyo cod ah oo ka dhacday 13 degmo oo ka tirsan maamulka. Hase yeeshee, Guddiga Doorashooyinka Koonfur Galbeed weli kama hadlin in dagaalka saakay uu saameyn ku yeeshay jadwalkii dhaarinta xildhibaannada iyo in kale.
