Jigjiga (Dawan) — Wakaaladda Iskaashatooyinka Deegaanka Soomaalida iyo shirkadda ChromePay ayaa saxeexay heshiis shan sano ah oo lagu casriyeynayo laguna dhijitaalaynayo nidaamyada maaliyadeed ee iskaashatooyinka deegaanka, sida uu Talaadadii sheegay Telefishinka Deegaanka Soomaalida (SRTV).
Sida heshiiska dhigayo, ChromePay ayaa taageero siin doonta 35 iskaashato si ay ugu gudbaan nidaamyo maaliyadeed oo dhijitaal ah, isla markaana ay ula jaanqaadaan tiknoolajiyadda cusub.
Shirkaddu waxay sidoo kale bixin doontaa tababarro iyo barnaamijyo lagu kobcinayo aqoonta iyo awoodda shaqaalaha iyo xubnaha iskaashatooyinka, iyadoo diiradda la saarayo xoojinta awoodda ay u leeyihiin maareynta adeegyada maaliyadeed ee dhijitaalka ah.
