Puntland (Dawan) – Madaxweynaha Puntland, Saciid Cabdullaahi Deni, ayaa si adag uga jawaabay hadal dhowaan sheegay Ra’iisul Wasaaraha Soomaaliya, Xamse Cabdi Barre, kaasi oo loo fasirtay dhaliil siyaasadeed oo ka dhan ah madaxda Puntland.
Madaxweyne Deni, oo xalay ka hadlayay munaasabad ka dhacday magaalada Garoowe oo lagu xusayay Xornimada Koofurta Soomaaliya iyo Midnimada dalka, ayaa sheegay in Puntland aysan qabin cuqdad, balse ay leedahay mowqif siyaasadeed iyo aragti dowladnimo oo cad.
“Reer Puntland cuqdad ma qabaan, waxay rabaan way caddahay, dowladnimadana dan bay ka leeyihiin,” ayuu yiri Madaxweyne Deni, isagoo intaas ku daray in Puntland ay si cad u muujisay aragtideeda ku aaddan siyaasadda dalka.
Hadalka Madaxweynaha Puntland ayaa yimid kadib markii Ra’iisul Wasaare Xamse Cabdi Barre, oo ka hadlayay xarig-jarka xarunta cusub ee Wasaaradda Beeraha, uu sheegay inay jiraan dad uu ku tilmaamay kuwo kala fogeynaya shacabka Soomaaliyeed, isla markaana aan ku koobnayn oo keliya madaxda Somaliland.
