Boosaaso (Dawan) – Madaxweynaha Dowladda Puntland, Siciid Cabdullaahi Deni, ayaa qiray inay jiraan ganacsato ka cabanaya khidmadaha iyo adeegyada Dekadda Boosaaso, balse wuxuu beeniyay wararka sheegaya in dekaddu xiran tahay, isagoo sheegay in howlaha ganacsi ee dekaddu ay si caadi ah u socdaan.
Hadalka Madaxweyne Deni ayaa kusoo aadaya xilli maalmihii lasoo dhaafay ay warbaahinta gudaha qaarkeed baahiyeen warar sheegaya in Dekadda Boosaaso iyo guud ahaan ganacsiga magaalada uu hakad galay, kaddib cabashooyin ka dhashay khidmadaha lagu soo rogay maraakiibta badeecadaha keenta dekadda.
Madaxweyne Deni ayaa sheegay in hawlaha dekaddu ay weli socdaan, isagoo xusay in xoolaha laga dhoofinayo Dekadda Boosaaso, shidaalkuna uu kasoo degayo, halka doomaha iyo maraakiibta ganacsiguna ay sii wadaan howlahooda.
“Dekadda Boosaaso ma xirna, xoolihii waa dhoofayaan, shidaalkii waa soo degayaa, doomihiina way socdaan,” ayuu yiri Madaxweyne Deni.
Wuxuu sheegay in xirnaanshaha dhowr albaab ama goobo ganacsi aan loo fasiri karin in dekadda iyo ganacsiga Puntland oo dhan ay xiran yihiin, isagoo bulshada Puntland u xaqiijiyay in ganacsigu furan yahay, dekadduna ay shaqeyneyso.
