Deni oo sheegay in goobaha dalxiisku soo jiidan karaan qurbo-joogta

Boosaaso (Dawan) – Madaxweynaha Puntland, Siciid Cabdullaahi Deni, ayaa sheegay in horumarinta goobaha dalxiiska iyo nasashada ay qeyb ka qaadan karto soo jiidashada qurbo-joogta dib ugu soo laabanaysa dalka, haddii la diyaariyo adeegyo iyo xarumo ku habboon.

Deni ayaa hadalkan ka sheegay magaalada Boosaaso, halkaas oo uu xarigga uga jaray Beerta Dalxiiska ee Baalade, oo ah goob cusub oo dalxiis iyo nasasho ah oo laga hirgeliyay magaalada.

Madaxweynaha ayaa bogaadiyay ganacsatada Puntland ee maalgashiga ku sameynaya dalkooda, isagoo sheegay in mashaariicda noocan ah ay muujinayaan suurtagalnimada in gudaha dalka laga abuuro fursado dhaqaale, adeegyo madadaalo, iyo goobo soo jiita dadka deegaanka iyo qurbo-joogta.

Sida ay sheegtay Madaxtooyada Puntland, Deni ayaa xusay in haddii la helo goobo dalxiis oo casri ah, ay qurbo-joog badan ku dhiirran karaan inay dalka yimaadaan, maalgashadaan, ama waqti fasax ah ku qaataan gudaha Puntland.

Beerta Baalade waxaa hirgeliyay ganacsade Cabdiladiif Yuusuf Barre. Furitaanka xarunta waxaa ka qeyb galay Guddoomiye Ku-xigeenka Koowaad ee Golaha Wakiillada Puntland Maxamed Baari Shire, xubno ka tirsan goleyaasha dowlad-goboleedka, la-taliyeyaal, Guddiga Tacliinta Sare ee Puntland, maamulka gobolka Bari, maamulka degmada Boosaaso, ganacsato iyo marti sharaf kale.

Furitaanka Beerta Baalade ayaa kusoo aadaya xilli Puntland ay xoogga saarayso dhiirrigelinta maalgashiga gaarka loo leeyahay, gaar ahaan mashaariicda adeegyada bulshada, dalxiiska iyo goobaha nasashada, kuwaas oo loo arko inay ka qayb qaadan karaan kobaca dhaqaalaha deegaanka.