Shabeellaha Hoose (Dawan) – Dowladda Federaalka Soomaaliya ayaa sheegtay in ciidamadeeda gaarka ah ay qabteen masuul ka tirsan Al-Shabaab oo u qaabilsanaa abaabulka dagaallamayaasha ee gobolka Shabeellaha Hoose, sida ay baahisay Warbaahinta Qaranka Soomaaliyeed.
Masuulkan ayaa lagu magacaabay Salaad Macalin Cusmaan Cabdiyow, oo sidoo kale loo yaqaan Salaad Dheere, waxaana lagu qabtay tuulada SooMaray oo qiyaastii 5 km galbeed kaga beegan deegaanka Mubaarag.
Warbaahinta dowladda ayaa sheegtay in hawlgalkan ay fuliyeen Ururka 203-aad, Guutada 20-aad ee Kumaandooska Gorgor ee Ciidanka Xoogga Dalka Soomaaliyeed.
Sida lagu sheegay warbixinta, masuulkan ayaa Al-Shabaab u qaabilsanaa abaabulka iyo hagidda dagaallamayaasha ka howlgala tuulooyin dhowr ah oo ay ka mid yihiin Buula Cabdulle, Mudulow, Buula-Doorka iyo Ugunji Busley, kuwaas oo dhammaantood hoostaga deegaanka Mubaarag.
