Jeddah (Dawan) – Dowladda Jabuuti ayaa Sacuudi Carabiya kula saxiixatay saddex heshiis oo muhiim u ah diyaarinta xujeyda dalkaas ee gudan doonta waajibaadka Xajka sannadka 2027, kuwaas oo diiradda saaraya hoyga, daryeelka caafimaadka iyo duulimaadyada. Heshiisyadan ayaa yimid kaddib kulammo xiriir ah oo wafdiga Jabuuti uu magaalada Jeddah kula yeeshay mas'uuliyiin iyo shirkado ka shaqeeya adeegyada Xajka. Wafdiga waxaa hoggaaminayay Wasiirka Arrimaha Islaamka iyo Awqaafta Jabuuti, Muumin Xasan Barre.
Wafdiga ayaa Sacuudi Carabiya u tegay ka qaybgalka shirkii iyo bandhiggii lixaad ee Xajka, oo sannad kasta ay dalalka Muslimiintu kaga wada xaajoodaan adeegyada iyo habraacyada la xiriira soo dhoweynta xujeyda. Intii uu socday shirkan, wasiirku wuxuu dhiggiisa Sacuudiga, Tawfiq Al-Rabiah, la saxiixday is-afgarad lagu dejinayo qaab-dhismeedka guud ee Xajka 2027.
Heshiiska koowaad ayaa lala galay shirkadda Sacuudiga laga leeyahay ee Al Rifadah, wuxuuna ku saabsan yahay adeegyada hoyga iyo gaadiidka gudaha. Shirkaddu waxay mas'uul ka noqon doontaa hoyga xujeyda ee Maka iyo Madiina, cuntada, gaadiidka dhulka iyo adeegyada soo dhoweynta ee goobaha Mina, Carafaad iyo Muzdalifa.
Goobahaasi ayaa ka mid ah meelaha ugu muhiimsan ee lagu guto waajibaadka Xajka. Heshiiska waxaa dhinaca Jabuuti u saxiixday Agaasimaha Maamulka iyo Maaliyadda ee Wasaaradda, Ikraam Cige Cusmaan, iyadoo uu goobjoog ka ahaa wasiirku.