Jabuuti (Dawan ) – Jabuuti ayaa qabatay finalka Horyaalka Qaranka ee Dabbaasha sanadkan, kaas oo ah tartan ay ka qeybgaleen in ka badan 270 ciyaartooy oo ka kala yimid caasimadda iyo qaar kamid ah gobollada dalka.
Tartankan oo uu soo qabanqaabiyay Xiriirka Dabbaasha Jabuuti, isla markaana hoos yimaada Xoghaynta Dowladda ee Arrimaha Ciyaaraha, ayaa lagu qabtay xarunta dabbaasha ee Bisin ee magaalada Jabuuti.
Ciyaartooyda ka qeybgashay tartanka ayaa da’doodu u dhaxeysay 6 ilaa 23 sano, waxayna ku tartameen 12 qeybood oo kala duwan. Tartanka ayaa lagu tilmaamay mid si weyn u muujiyay xirfadda dhalinyarada Jabuuti ee dhinaca dabbaasha iyo dadaallada lagu horumarinayo ciyaaraha dalka.
Finalka sanadkan ayaa sidoo kale lagu xusay dib-u-doorashada Madaxweynaha Jamhuuriyadda Jabuuti, Ismaaciil Cumar Geelle, iyadoo mas’uuliyiinta xiriirka ay sheegeen in tartanka loogu magac daray munaasabaddaas.
