Baydhabo(Dawan ) – Guddiga Madaxa-bannaan ee Doorashooyinka Qaranka iyo Soohdimaha (GMDQS) ayaa Axaddii sheegay inuu sugayo go’aanka Maxkamadda Sare ee Soomaaliya kahor inta aan la guda gelin doorashada guddoonka Golaha Wakiilada Dowlad Goboleedka Koonfur Galbeed Soomaaliya.
War-saxaafadeed kasoo baxay guddiga ayaa lagu sheegay in hore loo shaaciyay in 18-ka May ay qabsoomi doonto doorashada guddoonka Golaha Wakiilada Koonfur Galbeed.
Hase yeeshee, guddiga ayaa sheegay inuu weli sugayo go’aanka Maxkamadda Sare ee Jamhuuriyadda Federaalka Soomaaliya, oo awood u leh ansixinta natiijooyinka doorashooyinka sida uu dhigayo sharciga doorashooyinka dalka.
Guddiga ayaa tixraacay Qodobka 7-aad, Farqaddiisa 1-aad, Xarafkiisa (f) ee sharciga doorashooyinka, isagoo sheegay in go’aanka maxkamadda loo baahan yahay kahor ansixinta rasmiga ah ee natiijooyinka doorashada.
