Doorashada Koonfur Galbeed oo dib loo dhigay

Baydhabo (Dawan ) – Guddiga Madaxa Bannaan ee Doorashooyinka Qaranka iyo Soohdimaha ayaa ku dhawaaqay dib u dhac ku yimid jadwalka doorashooyinka, iyadoo la kordhiyay muddada soo gudbinta liisaska musharraxiinta, isla markaana dib u habeyn lagu sameeyay maalmaha doorashada Dowlad-Goboleedka Koonfur Galbeed.

War-saxaafadeed ka soo baxay Guddiga Doorashooyinka ayaa lagu sheegay in go’aankan uu yimid kadib wadatashi uu guddigu la yeeshay madaxda ururrada siyaasadda, si loo qiimeeyo caqabadaha jira loona hubiyo in geeddi-socodka doorashooyinku noqdo mid hufan oo waafaqsan sharciga.

Sida lagu sheegay bayaanka guddiga, muddada kama dambaysta ah ee soo gudbinta liisaska musharraxiinta ayaa laga dhigay 5-ta May 2026, si ururrada siyaasadda loo siiyo waqti dheeraad ah oo ay ku dhammaystiraan shuruudaha looga baahan yahay.

Dhanka kale, guddigu wuxuu dib u dhigay doorashada golayaasha deegaanka iyo Golaha Wakiillada ee Dowlad-Goboleedka Koonfur Galbeed, oo markii hore loo qorsheeyay 28-ka Abriil, waxaana hadda loo asteeyay 10-ka May 2026.

Guddiga ayaa sheegay in tallaabadan ay salka ku hayso muhiimadda ay leedahay in doorashooyinku u dhacaan si xor, xalaal ah, isla markaana lagu kalsoonaan karo, iyadoo la tixgelinayo talooyinka ka yimid dhinacyada kala duwan.

Deegaannada Dowlad-Goboleedka Koonfur Galbeed waxaa ka socda diyaar-garowga doorashooyinka qof iyo codka ah ee la filayo in ay ka dhacaan deegaanno badan oo dalka ah, xilli siyaasiyiinta mucaaradku ay si weyn uga soo horjeedaan doorashooyinka ay dowladda waddo.