Muqdisho (Dawan) – Dowladda Federaalka Soomaaliya ayaa qorsheyneysa iinay guryo u dhisto 12,000 oo qoys kuwaas 30-kii sano ee la soo dhaafay deganaa dhulal dowladeed, sida uu sheegay Wasiirka Hawlaha Guud, Dib-u-dhiska iyo Guriyeynta Soomaaliya, Ayuub Ismaaciil Yuusuf.
Sida uu sheegay wasiirku, oo shir jaraa’id qabtay maanta oo Jimce ah, mashruucan guriyeynta ah ayaa loogu talagalay dad lagu qiyaasay ku dhowaad 80,000 oo qof.
“Sida aad ka warqabtaan, dad badan oo 30-kii sano ee u dambeeyay, xilligii uu dalku burbursanaa, deganaa goobo aan ku habboonayn ama goobo ay dowladdu u baahneyd inay adeegyo ka hirgeliso,” ayuu yiri wasiirku.
Wasiirka ayaa sheegay in wejiga koowaad ee mashruuca lagu dhisi doono 6,000 oo guri, iyadoo la qorsheynayo in laga hirgeliyo deegaanka Jaziira ee duleedka Muqdisho.
Sida uu wasiirku sheegay, qorshahan ayaa qayb ka ah dadaallada lagu ballaarinayo magaalada Muqdisho, iyadoo qoysaska dib loogu dejinayo deegaan cusub oo ka baxsan goobaha ay dowladdu u baahan tahay.
“Waa shaqo aan soo wadnay shantii bilood ee ugu dambaysay, oo ahayd qorshe ballaaran oo dib-u-dejin loogu sameynayo in ka badan 12,000 oo qoys oo Soomaaliyeed,” ayuu yiri Wasiir Ayuub Ismaaciil Yuusuf oo la hadlay Dawan.