Dowladda oo sheegtay in la soo badbaadiyay dad u afduubnaa AS

Muqdisho (Dawan ) – Dowladda Soomaaliya ayaa sheegtay in Ciidanka Xoogga Dalka Soomaaliyeed, gaar ahaan Kumaandooska Danab, ay sagaal qof ka soo badbaadiyeen kooxda Al-Shabaab, xilli ay sidoo kale dileen shan dagaalyahan.

War-saxaafadeed ka soo baxay Wasaaradda Gaashaandhigga Soomaaliya ayaa lagu sheegay in howlgalka uu ka dhacay degmada Gamboole ee gobolka Shabeellaha Dhexe, halkaas oo kooxda ay ku heysteen 9 qof oo ay dowladda sheegtay in la afduubay.

Wasaaradda ayaa sheegtay in intii uu howlgalka socday ay ciidamada dileen shan xubnood oo ka tirsan Al-Shabaab, oo uu ku jiray qof ay dowladda ku tilmaantay horjooge ka tirsan kooxda.

"Intii uu howlgalka socday, ciidamada ayaa ku guuleystay inay dib xorriyaddooda ugu soo celiyaan sagaal qof oo ay afduub u haysteen argagixisadu, iyagoo sidoo kale dilay shan xubnood oo ka tirsanaa Khawaarijta, oo uu ku jiray horjoogihii kooxda" ayay Wasaaraddu ku tiri, war-saxaafadeedka.

Qoraalka dowladda ayaa diiradda saaray in ujeeddada howlgalka ay ahayd badbaadinta dadka rayidka ah ee la afduubtay, isla markaana lagu wiiqayo dhaqdhaqaaqyada Al-Shabaab ee ka dhanka ah shacabka ku nool deegaannada Shabeellaha Dhexe.

Dowladda Soomaaliya ayaa sheegtay in howlgalka uu qayb ka yahay dadaallada amni ee lagu xoojinayo nabadgelyada, laguna sii wadi doono howlgallada ka dhanka ah Al-Shabaab.