Duqeymo ka dhacay afar gobol oo lagu dilay in ka badan 50 AS ah

Muqdisho (Dawan)- Ciidamada dowladda Soomaaliya, oo kaashanaya saaxiibbada caalamka, ayaa dilay ugu yaraan 54 ka tirsan Al-Shabaab, kaddib duqeymo cirka ah oo laga fuliyay gobollo kala duwan, sida ay sheegtay Wasaaradda Gaashaandhigga.

War-saxaafadeed ay soo saartay wasaaradda ayaa lagu sheegay in howlgalka lagu beegsaday deegaannada Tardo ee gobolka Hiiraan, Ugunji ee Shabeellaha Hoose, Daynuunaay ee gobolka Baay, iyo Qumbi ee Jubbada Hoose.

Wasaaradda ayaa sheegtay in duqeymaha lagu burburiyay fariisimo muhiim ah oo ay ku sugnaayeen dagaalyahannada Al-Shabaab, kuwaas oo la sheegay inay maalmihii u dambeeyay dib isugu abaabulayeen goobahaas.

“Duqeymahan waxay khasaare weyn gaarsiiyeen maleeshiyaadka Khawaarijta Al-Shabaab,” ayaa lagu yiri war-saxaafadeedka, iyadoo la adeegsanayo erayga ay dowladda u adeegsato kooxda.

Waxaa sidoo kale la sheegay in la burburiyay goobo muhiim ah oo ay kooxda u adeegsan jirtay qorsheynta iyo fulinta weerarrada.

Sida ay wasaaraddu sheegtay, howlgaladan ayaa qayb ka ah dadaallada joogtada ah ee lagu wiiqayo awoodda Al-Shabaab, laguna xakameynayo adeegsiga deegaannada miyiga ah ee ay ka soo abaabulaan weerarrada ka dhanka ah shacabka.

Soomaaliya ayaa xoojisay howlgalada milatari ee ka dhanka ah Al-Shabaab sanadihii u dambeeyay, iyadoo inta badan kaashaneysa saaxiibbada caalamka si loo fuliyo duqeymo iyo howlgallo isku dhafan.