Erdoğan oo u rajeeyay guul markabka Çağrı Bey ee kusoo wajahan Soomaaliya

Ankara (Dawan)— Madaxweynaha Turkiga, Rajab Dayib Erdoğan ayaa Axaddii u rajeeyay guul iyo kheyr safarka markabka qodista shidaalka ee Çağrı Bey, kaas oo usoo shareecday Soomaaliya si uu uga fuliyo hawlo shidaal qodis ah.

Hadalka madaxweynaha ayaa yimid kaddiib markii uu khadka taleefanka kula hadlayay Wasiirka Tamarta iyo Kheyraadka Dabiiciga ah ee Turkiga, Alparslan Bayraktar, xilli uu wasiirku ka qaybgalayay munaasabadda sagootinta markabka oo ka dhacday dekedda Taşucu, gobolka Mersin ee koonfurta dalka.

Bayraktar ayaa baraha bulshada ku baahiyay muuqaal muujinaya wada-hadalka uu la yeeshay Erdoğan intii ay socotay munaasabadda. Madaxweynaha ayaa markabka iyo shaqaalihiisa ku yiri: “Waxaan Ilaahay ka baryayaa in safarkiinnu noqdo mid kheyr ku biloowda.”

Erdoğan ayaa sidoo kale adkeeyay muhiimadda safarkan oo la filayo inuu socdo ilaa bisha Abriil, isaga oo muujiyay rajada uu ka qabo in laga helo “warar farxad leh iyo bishaarooyin wanaagsan” oo ka imanaya howlgalka Soomaaliya. Waxa uu intaa ku daray in mashruucani uu gacan ka geysan doono kor u qaadista sumcadda maraakiibta qodista shidaalka Turkiga ee caalamka.

Tallaabadan ayaa daba socota heshiis dawladeed oo la saxeexay bishii Maarso 2024 si loo horumariyo qaybaha saliidda iyo gaasta ee Soomaaliya. Shirkadda tamarta ee dowliga ah ee Turkiga, Turkish Petroleum (TPAO), ayaa haysata liisamada baarista ee saddex qaybood (blocks) oo ku yaal biyaha Soomaaliya, halkaas oo sahan (seismic surveys) lagu soo gabagabeeyay sannadkii hore.

Çağrı Bey waxaa wehlin doona ciidamo badda Turkiga ah, oo ay ku jiraan maraakiibta dagaalka ee kala ah TCG Sancaktar, TCG Gökova, iyo TCG Bafra, si loo xaqiijiyo amniga inta uu hawlgalku socdo.