Muqdisho (Dawan)— Shirkadda maamusha Garoonka Caalamiga ah ee Aadan Cadde ee Favori LLC iyo shirkadda Heegan Trolley ayaa Axaddii kala saxiixday heshiis iskaashi oo lagu horumarinayo adeegyada qaadista shandadaha iyo alaabta rakaabka.
Heshiiska ayaa Heegan Trolley u oggolaanaya inay garoonka ka hirgeliso adeegyo iyo qalab casri ah oo rakaabka u fududeynaya inay shandadahooda ku kala gudbiyaan qeybaha duulimaadyada, soo degista iyo afaafka garoonka.
Mas’uuliyiinta labada shirkadood ayaa sheegay in adeeggan cusub looga gol leeyahay dhimista waqtiga rakaabku ku bixiyo qaadista alaabtiisa, isla markaana sare loogu qaado tayada adeegyada uu garoonku bixiyo.
Munaasabadda saxiixa waxaa ka qeyb galay maareeyaha Favori, guddoomiye ku-xigeenka Heegan Trolley, maareeye ku-xigeenka arrimaha ammaanka garoonka iyo mas’uuliyiin kale.
