Gaalkacyo (Dawan)- Magaalada Gaalkacyo ee xarunta u ah gobolka Mudug ayaa si rasmi ah looga dhagax-dhigay mashruuca biyo-ka-saarista magaalada, kaas oo loogu talagalay in wax looga qabto biyaha roobka ee magaalada saameeya. Munaasabadda dhagax-dhigga ayaa waxaa ka qeyb galay xildhibaano, wasiirro, maamulka gobolka Mudug ee puntland, maamulka degmada Gaalkacyo iyo masuuliyiin kale.
Sidoo kale, waxaa si rasmi ah loo kala saxiixday heshiiska mashruuca, kaas oo dhex maray Puntland, maamulka degmada Gaalkacyo, Guddiga Horumarinta Degmada iyo shirkadda TTN Construction oo loo xilsaaray fulinta mashruuca. Mashruucan ayaa ah wajiga koowaad ee qorshaha biyo-ka-saarista Gaalkacyo, waxaana fulinaysa TTN Construction, oo ah shirkad Soomaaliyeed oo xarunteedu tahay magaalada Garoowe.
Guddiga Horumarinta Degmada Gaalkacyo ee Puntland, ayaa sheegay in mashruucu yahay mid ay tahay in bulshada oo dhan ay ka qeyb qaadato, iyagoo xusay in iskaashiga bulshada uu yahay jidka ugu muhiimsan ee lagu xaqiijin karo guusha mashruuca. Qorshaha ayaa dhigaya in biyo-ka-saarista Gaalkacyo lagu fuliyo afar waji, kuwaas oo dhammaantood lagu qiyaasay kharash dhan 20 milyan oo dollar.
