Galmudug oo daahfurtay mashruuca Bulsho ee adeegyada dadweynaha

Dhuusamreeb (Dawan) – Madaxweynaha Dowlad Goboleedka Galmudug, Axmed Cabdi Kaariye, ayaa Sabtigii daah-furay Mashruuca Bulsho oo lagu horumarinayo adeegyada aasaasiga ah, laguna xoojinayo awoodda dowladaha hoose ee deegaannada Galmudug.

Mashruucan oo ay hoggaamineyso Dowladda Federaalka Soomaaliya, gaar ahaan Wasaaradda Arrimaha Gudaha, Federaalka iyo Dib-u-heshiisiinta, isla markaana uu taageerayo Bangiga Adduunka, ayaa diiradda saaraya horumarinta adeegyada dadweynaha, xoojinta dowladaha hoose, adkeysiga bulshada, dib-u-heshiisiinta iyo dowlad-dhiska heer degmo.

Munaasabadda daah-furka oo ka dhacday Madaxtooyada Galmudug, waxaa ka qeyb galay wasiirro ka tirsan maamulka Galmudug, Agaasimaha Guud ee Wasaaradda Arrimaha Gudaha ee Dowladda Federaalka Soomaaliya, maamulka Gobolka Galgaduud iyo xubno ka tirsan bulshada.

Madaxweyne Axmed Cabdi Kaariye ayaa sheegay in mashruucu ka tarjumayo hirgelinta nidaamka federaalka, maadaama uu adeegyada dowladda u dhoweynayo bulshada, isla markaana uu xoojinayo daadejinta dowladnimada.

Waxa uu xusay in degmooyinku ay si toos ah u soo xulan doonaan baahiyaha mudnaanta leh, si adeegyada loo waafajiyo duruufaha iyo baahiyaha bulshada deegaanka.

Sidoo kale, Madaxweynaha Galmudug ayaa sheegay in mashruucu gaari doono deegaannada laga saaray Al-Shabaab, kuwaas oo loo qorsheeyay barnaamijyo xasilin ah, halka degmooyinka nabdoon iyo magaalooyinka waaweynna ay heli doonaan taageero ku saleysan baahiyahooda.

Kaariye ayaa ku boorriyay Wasaaradda Arrimaha Gudaha ee Galmudug, maamulka degmooyinka iyo dowladaha hoose inay si hufan u hirgeliyaan mashruuca, si bulshada Galmudug ay uga faa'iideysato, isagoo tilmaamay in uu qeyb ka yahay dadaallada lagu xoojinayo dowlad-dhiska, amniga iyo horumarka deegaanka.