Muqdisho (Dawan)- Laba konteenar oo Bajaaj ah, shirkad qalab caafimaad keentay dalka oo shaqaaleysiisay ku dhowaad 300 oo qof iyo maalgashi gaasaska warshadaha ah–waa qayb ka mid ah safarka ganacsi ee Musharax madaxweyne Cumar Cabdiqaadir Axmed Fiqi. Hadda wuxuu doonayaa inuu khibraddaas ganacsi u beddelo awood siyaasadeed, isaga oo markii labaad u tartamaya xilka madaxweynaha Soomaaliya.
Shirkad la dhiso iyo dal la hoggaamiyo ma isku xirfad baa?
Wareysi uu siiyay Irmaan Podcast oo ka baxa Dawan TV, ayuu Fiqi kaga hadlay soo laabashadiisii Soomaaliya, ganacsiyadii uu hirgeliyay, caqabadihii uu la kulmay iyo sababta uu ugu dambayn siyaasadda ugu soo ruqaansaday.
Cumar Fiqi wuxuu Soomaaliya dib ugu soo laabtay sannadkii 2000, xilli dalku la tacaalayay amni-darro, burbur dhaqaale iyo adeegyo caafimaad oo kooban. Inkasta oo uu dibadda ka haystay shaqo iyo nolol deggan, wuxuu sheegay inuu doortay inuu dalkiisa ka shaqeeyo.
“Waxaan arkay inaan dalka gudihiisa wax badan kaga tari karo intii aan dibadda mushahar uga shaqaysan lahaa,” ayuu yiri.
Baahida ugu horreysay ee uu fursadda ganacsi ka dhex arkay waxay ahayd caafimaadka. Wuxuu bilaabay shirkad keenta qalabka ay u baahan yihiin isbitaallada iyo shaybaarrada, taas oo markii dambe u xuubsiibatay Humancare Diagnostics.
Sida uu Fiqi sheegay, shirkaddu waxay maanta ka shaqaysaa deegaanno kala duwan oo Soomaaliyeed iyo Jabuuti, waxaana ka shaqeeya ku dhowaad 300 oo qof. Waxa uu sidoo kale sheegay inay ka mid ahaayeen ganacsatadii dalka keentay qalabka casriga ah ee CT Scan-ka iyo MRI-ga.
Himiladu kuma koobnayn keenista qalabka. Shirkaddu waxay tababartay dhalinyaro Soomaaliyeed oo rakiba, maamula, isla markaana dayactira qalabka caafimaadka.
“Ujeeddadu waxay ahayd in qalabka dalka laga helo, lana helo dad Soomaaliyeed oo rakibi kara, hagaajin kara, kuna shaqayn kara,” ayuu yiri.
Fiqi wuxuu fursad kale ka arkay gaadiidka dadweynaha. Muqdisho waxaa ka jiray gaadiid yari, halka dhalinyaro badanna aysan haysan shaqooyin ay ku tiirsanaadaan.
Wuxuu sheegay inay keeneen laba konteenar oo ay ku jireen ku dhowaad 50 mooto oo nooca Piaggio ah. Mashruuca waxaa loogu magac daray Shaqo Abuur, isaga oo isku darayay fududeynta isu-socodka iyo abuurista il dhaqaale oo dhalinyaradu ku shaqaysato.
“Waxa noo muuqatay inay jirto baahi gaadiid, laakiin waxa noogu muhiimsanaa in dhalinyaradu ku shaqaysan karaan, qoysaskoodana ku biilan karaan,” ayuu sheegay.
Labadii konteenar ee ugu horreeyay si degdeg ah ayaa loo iibsaday, dalabkiina wuu kordhay. Dhalinyaro ayaa sidoo kale loo tababaray wadista iyo farsamaynta mootooyinka, tirada dhalinyarada mootooyinka ka shaqeeya waxaa lagu qiyaasaa hadda in ka badan 50,000.
