Garoonka diyaaradaha Cali-Sabiix oo la casriyeynayo

Jabuuti, Febraayo 28, 2026 (Dawan) – Ra’iisul Wasaaraha Jabuuti, Cabdulqaadir Kaamil Maxamed, ayaa Jimcihii si rasmi ah u furay mashruuc dib-u-dayactir iyo casriyeyn loogu sameynayo Garoonka Diyaaradaha ee Cali-Sabiix, kaas oo ah xarun istaraatiiji ah oo ku dhow xuduudaha Itoobiya iyo Soomaaliya, sida ay werisay wakaaladda wararka Jabuuti.

Mashruucan casriyeynta ah waxaa hormuud ka ah Ciidanka Qalabka Sida ee Jabuuti, iyagoo kaashanaya Ciidamada Faransiiska ee ku sugan dalkaas. Hindisahan ayaa ujeeddadiisu tahay xoojinta awoodda garoonka ee dhinacyada difaaca dhulka, ilaalada amniga iyo gargaarka bini’aadantinimo, maadaama gobolkani leeyahay muhiimad istaraatiiji ah oo dhinaca amniga iyo saadka ah.

Shaqooyinka laga fulinayo garoonka ayaa isugu jira dib-u-dhiska dhababbada diyaaradaha, casriyeynta calaamadaha hagista, iyo kor u qaadista nidaamyada amniga.

Bilowga mashruucan ayaa ku soo beegmay xilli uu Ra’iisul Wasaaruhu ku jiray socdaalkiisii caadiga ahaa ee bisha Ramadaan, kaas oo madaxda sare ee dowladda ay ku booqdaan gobollada si ay u qiimeeyaan kaabayaasha dhaqaalaha iyo baahiyaha bulshada.

“Horumarka kaabayaasha iyo amnigu waa kuwo is-garabsanaya,” ayuu yiri Ra’iisul Wasaare Cabdulqaadir Kaamil Maxamed, isagoo xusay inay ka go’an tahay xukuumaddiisa xoojinta kaabayaasha istaraatiijiga ah iyo wax ka qabashada baahiyaha aasaasiga ah ee dadweynaha.

Ra’iisul Wasaaraha waxaa socdaalka ku weheliyay wafdi heer sare ah oo ka kooban wasiirro ay ka mid yihiin Wasiirka Dhaqaalaha iyo Maaliyadda, Wasiirka Miisaaniyadda, Wasiirka Gaashaandhigga, iyo Wasiirka Kaabayaasha Dhaqaalaha iyo Qalabka. Sidoo kale, waxaa wafdiga qayb ka ahaa wasiirrada Waxbarashada iyo Deegaanka, iyo xubno ka tirsan Baarlamaanka oo laga soo doorto gobolka.

Kahor munaasabadda, Ra’iisul Wasaaruhu wuxuu wada-tashiyo la yeeshay masuuliyiinta deegaanka iyo madax-dhaqameed ka socday deegaannada Holl-holl, Daasbiyo iyo Faradiil. Wakiillada deegaanka ayaa tilmaamay in horumarinta jidadka iyo adeegyada dadweynaha ay yihiin mudnaanta koowaad ee gobolka.

Dalka Jabuuti waxaa ku yaalla saldhigga ciidan ee ugu weyn ee Faransiisku ku leeyahay Afrika, sidoo kale wuxuu martigeliyaa saldhigyo ay leeyihiin Mareykanka, Shiinaha iyo Jabaan, taasoo la xiriirta booska istaraatiijiga ah ee uu ku leeyahay marin-biyoodka Bab al-Mandab.