New York (Dawan) – Golaha Ammaanka ee Qaramada Midoobay ayaa si aqlabiyad buuxda ah u ansixiyay qaraar cusub oo lagu xoojinayo isla-xisaabtanka dambiyada ka dhanka ah ciidamada nabad ilaalinta ee Qaramada Midoobay, iyadoo la adkeynayo dadaallada caalamiga ah ee lagu ilaalinayo shaqaalaha ka howlgala deegaannada colaadaha iyo xasillooni darrada ka jirto.
Qaraarka tirsigiisu yahay 2823 (2026), oo ay diyaariyeen Denmark iyo Pakistan isla markaana ay taageereen in ka badan 150 dal oo xubno ka ah Qaramada Midoobay, ayaa ku baaqaya in la xoojiyo baaritaannada iyo dacwadaha lagu soo oogayo dadka ka dambeeya weerarada lagu qaado ciidamada nabad ilaalinta ee Qaramada Midoobay.
Golaha Ammaanka ayaa carrabka ku adkeeyay in isla-xisaabtanku yahay furaha ka hortagga weerarada mustaqbalka iyo la dagaallanka dhaqanka ka baxsiga ciqaabta.
Sida ay sheegtay Qaramada Midoobay, tan iyo sanadkii 1948 waxaa weeraro ula kac ah lagu dilay 1,095 askari oo ka tirsanaa ciidamada nabad ilaalinta, halka 359 ka mid ah ay dhinteen tan iyo sanadkii 2013. Kumannaan kale ayaa dhaawacyo kala duwan soo gaareen iyagoo gudanaya waajibaadkooda.
Golaha Ammaanka ayaa xusay in inkastoo weerarada lagu qaado ciidamada nabad ilaalinta ay sii kordheen sanadihii u dambeeyay, haddana horumar laga sameeyay dhinaca caddaaladda. Tan iyo 2020, maxkamado kala duwan ayaa xukumay 103 qof oo lala xiriiriyay dilka 35 askari oo nabad ilaaliye ah iyo laba khabiir oo Qaramada Midoobay ka tirsanaa, kuwaas oo lagu dilay Jamhuuriyadda Bartamaha Afrika, Jamhuuriyadda Dimuqraadiga ah ee Congo, Lubnaan iyo Mali.
Markii uu soo bandhigayay qaraarka, Safiirka Pakistan u fadhiya Qaramada Midoobay, Caasim Iftikhaar Axmad, ayaa sheegay in ku dhowaad 4,500 askari oo nabad ilaaliye ah ay ku geeriyoodeen gudashada waajibaadkooda sannadihii la soo dhaafay, kuwaas oo 183 ka mid ah ay u dhasheen Pakistan.
Wuxuu sheegay in weerarada ka dhanka ah ciidamada nabad ilaalinta ay inta badan dhacaan iyadoo aan jirin isla-xisaabtan ku filan, wuxuuna ku baaqay in Golaha Ammaanku si dhow ula socdo baaritaannada iyo tallaabooyinka caddaaladeed ee ka dambeeya weerar kasta.
“Marka ciidamada nabad ilaalinta la dilo ama la dhaawaco iyagoo fulinaya waajibaad uu Golaha Ammaanku u igmaday, waa in Golaha uu si dhow ula socdaa waxa xiga; in xaqiiqooyinka la xaqiijiyo, baaritaannada la sameeyo, dambiilayaasha la aqoonsado iyo in caddaaladda la horkeeno,” ayuu yiri Caasim.
