Shanghai (Dawan)– Soomaaliya ayaa doonaysa inay ka faa’iidaysato fursadda ay u haysato inay badeecadaheeda cashuur la’aan ku geyso Shiinaha, si ay u gaarto suuq ay ku nool yihiin 1.4 bilyan oo macaamiil ah. Arrintan ayaa ku soo beegmaysa xilli dalku markii ugu horreysay xarun qaran ka furtay carwo ganacsiyeed weyn oo ka socota Shiinaha.
Wasiirka Ganacsiga iyo Warshadaha, Jamaal Maxamed Xasan, ayaa Khamiistii furay xarunta Soomaaliya ee Carwada Caalamiga ah ee Shiinaha ee Badeecadaha Dibadda (CIIE), oo ka socota magaalada Shanghai. Xarunta ayaa shirkadaha Soomaaliyeed ku soo bandhigayaan sisinta, fooxa iyo malmalka, sida ay sheegtay Wasaaradda Ganacsiga iyo Warshadaha.
Shiinaha ayaa bishii Diseembar 2024 Soomaaliya, oo ka mid ah 33-ka dal ee Afrika ee loo aqoonsan yahay dalalka ugu horumarka yar, u oggolaaday inay dhammaan badeecadaheeda cashuur la’aan ku dhoofiso dalkaas. Bishii Maajo ee sannadkan, Shiinaha ayaa nidaamkan ku fidiyey dhammaan 53-ka dal ee Afrika ee uu xiriirka diblomaasiyadeed la leeyahay, sida ay sheegtay Guddiga Cashuuraha Kastamka ee Shiinaha.
“Taas macnaheedu waxa weeye in badeecadaha Soomaaliya laga soo dhoofiyo ay mar walba ka jaban doonaan kuwa laga soo dhoofiyo dalalka Aasiya ama dalal kale,” ayay tiri Danjiraha Soomaaliya u fadhiya Shiinaha, Dr. Hodan Cismaan Cabdi.
Wasiir Jamaal ayaa sheegay in iibsadayaasha Shiinuhu ay xiise weyn u muujiyeen la macaamilka ganacsatada Soomaaliyeed, gaar ahaan dhinacyada wax-soo-saarka beeraha, xoolaha, kalluunka iyo sisinta.
“Waxaan rabnaa inaan dadka tusno in Soomaaliya ay khayraad leedahay, in Soomaaliya ay wax dhoofin karto, oo aynaan ahayn dal keliya wax soo dejiya,” ayuu u sheegay warbaahinta ku sugan magaalada Shanghai.