Muqdisho (Dawan)– Golaha Haweenka Qaranka Soomaaliya ayaa ugu baaqay guddiga doorashooyinka inuu ilaaliyo qoondada 30% ee haweenka inta lagu guda jiro doorashooyinka qof iyo codka ah ee dalka ka socda.
Guddoomiyaha Golaha Haweenka Qaranka, Senator Naciima Ibraahim Yuusuf, iyo Xoghayaha Guud Aamina Keyf Axmed Samatar ayaa booqday xarunta guddiga doorashooyinka, halkaas oo ay kula kulmeen guddoomiyaha iyo ku-xigeenka guddiga Khamiistii.
Naciima ayaa sheegtay in xisbiyada siyaasadeed ee gudbinaya liisaska musharraxiinta laga hubiyo inay ku jiraan tirada haweenka ee loo qoondeeyay.
Waxay sheegtay in inkastoo qoondada 30% si weyn looga hadlo, haddana hirgelinteeda aysan weli gaarin heerkii loo baahnaa.
“Marka laga hadlayo ilaalinta qoondada haweenka, mar walba waxaa la leeyahay 30%, 30% afka ayaa aad loogu adkeeyaa, laakiin fulinteeda waxay u muuqataa inaysan ahayn meeshii lagu rabay in la gaarsiiyo,” ayay tiri Naciima.
Waxay sidoo kale tilmaantay doorka haweenka ee waxbarashada, amniga iyo adeegyada bulshada, iyadoo sheegtay in kordhinta ka-qaybgalka haweenka ee siyaasadda ay gacan ka geysan karto caddaalad, shaqo wanaagsan iyo isla-xisaabtan.
Samatar ayaa sheegtay in ilaalinta qoondada haweenka ay tahay mudnaanta ugu weyn ee Golaha Haweenka, iyadoo xustay in qayb ka mid ah doorashooyinka socda, oo ay ku jiraan Koonfur Galbeed iyo Galmudug, ay soo dhowaadeen dhammaad.
