Muqdisho (Dawan)- Golaha Mihnadlayaasha Caafimaadka Qaranka Soomaaliya ayaa Cumar Axmed Qaadi u magacaabay Xoghayaha Guud ee Golaha, sida lagu sheegay go’aan rasmi ah oo ku taariikhaysan 20-ka Sebteembar. Magacaabista ayaa dhaqan gashay isla maalintii go’aanka la soo saaray, waxaana lagu saleeyay qodobbada 13-aad iyo 14-aad ee Sharciga Golaha Mihnadlayaasha Caafimaadka Qaranka Lr.31.
Qodobka 13-aad wuxuu Xoghayaha Guud ku tilmaamayaa madaxa fulinta ee NHPC, halka qodobka 14-aad uu qeexayo awoodaha iyo waajibaadka Xoghaynta Guud. Xoghaynta ayaa mas’uul ka ah fulinta go’aannada Golaha, isku-dubbaridka iyo kormeerka guddi-hoosaadyada, qabashada hawlaha maalinlaha ah iyo diyaarinta warbixinnada loo gudbinayo Golaha. Waxay sidoo kale Golaha meteli kartaa marka uusan fadhi ku jirin, balse awood uma laha inay hakiso ama beddesho go’aannadiisa.
Sharciga NHPC Lr.31 si gaar ah uma qeexayo habka lagu magacaabayo Xoghayaha Guud. Hase yeeshee, qodobka 16(9) wuxuu dhigayaa in shaqaaleysiinta shaqaalaha maamulka iyo shaqaalaha kale lagu saleeyo sharciyada khuseeya shaqaalaha rayidka Soomaaliyeed.
