Muqdisho (Dawan)– Golaha Mustaqbalka Soomaaliyeed ayaa cambaareeyay ciidamo hubaysan oo uu sheegay in maalmihii la soo dhaafay la dul dhigay hoyga madaxweynihii hore ee dalka, Shariif Sheekh Axmed, isagoo ku tilmaamay falal daandaansi iyo been-abuur ah oo lagu beegsanayo. Hadalka Golaha ayaa ku soo beegmay xilli eedeymo is-dhaafsi ah ay ka dhex taagan yihiin dowladda iyo mucaaradka.
War-saxaafadeed uu Goluhu soo saaray 11-kii Oktoobar, wuxuu ku sheegay in ciidamada la dul dhigay hoyga Shariif ay carqaladeeyeen hawl maalmeedkiisa, khatarna geliyeen amnigiisa.
Golaha ayaa Madaxweyne Xasan Sheekh Maxamuud, oo uu ku tilmaamay “Madaxweynaha muddo-xileedkiisu dhammaaday,” ku eedeeyay inuu halkii uu dalka u jiheyn lahaa wada-hadal dhab ah oo doorasho heshiis lagu yahay, uu ku socdo waddo uu ku bannaynayo dhiigga dadka aragtida ka duwan leh, gaar ahaan mucaaradka, isagoo hay’adaha amniga u adeegsanaya si sharci-darro ah.
Golaha Mustaqbalka ayaa ka digay cawaaqibka ka dhalan kara daandaansiga iyo argagax-gelinta uu sheegay inay qaar ka mid ah hay’adaha amniga ku hayaan hoyga Shariif, wuxuuna caddeeyay in mas’uuliyadda ay qaadi doono Xasan Sheekh Maxamuud. Wuxuu ugu baaqay inuu joojiyo tallaabooyinka keeni kara isku dhacyo, una jeesto heshiis laga gaaro doorashooyinka.
