Muqdisho (Dawan) – Dawan Media ayaa heshay dukumenti uu Golaha Mustaqbalka Soomaaliya ku soo bandhigay Qaabka Doorashada Tooska ah ee Ku-meel-gaarka ah (Transitional Direct Elections Model – TDEM) 2026. Soo jeedintan ayaa loogu talagalay in ay noqoto hannaan isku xira xaaladda siyaasadeed ee hadda jirta iyo himilada dastuuriga ah ee ah in Soomaaliya ay gaarto doorasho qof iyo cod ah.
Sida ku cad dukumentiga, qaabkan ayaa markii ugu horreysay taariikhda siyaasadeed ee casriga ah ee Soomaaliya horseedi kara in shacabka si toos ah u doortaan xubnaha Baarlamaanka Federaalka Soomaaliya iyo baarlamaannada dowlad-goboleedyada, iyadoo inta lagu jiro marxaladda kala guurka la sii ilaalinayo nidaamka awood-qaybsiga beelaha ee 4.5.
Dukumentiga ayaa si cad u kala saaraya doorashada tooska ah ee ku-meel-gaarka ah iyo doorashada buuxda ee qof iyo cod, isaga oo tilmaamaya in tan dambe ay tahay yoolka ugu dambeeya ee ku xusan dastuurka dalka.
Soo jeedinta ayaa dhigaysa in hirgelinta qaabkan lagu saleeyo heshiis siyaasadeed oo dhex mara Dowladda Federaalka Soomaaliya iyo Golaha Mustaqbalka Soomaaliya, kaas oo lagu magacaabay Hannaanka Hirgelinta Doorashooyinka Ku-meel-gaarka ah (Transitional Elections Implementation Framework – TEIF). Hannaankan ayaa hagaya qabsoomidda doorashooyinka heer federaal iyo heer dowlad-goboleed.
Sida ku cad dukumentiga, xisbiyada siyaasadeed kama qeyb geli doonaan doorashooyinka lagu qabanayo qaabkan ku-meel-gaarka ah. Halkii, nidaamka awood-qaybsiga 4.5 uu sii shaqeyn doono, iyadoo odayaasha dhaqanka ee la aqoonsan yahay ay sii wadi doonaan qoondaynta kuraasta baarlamaanka ee beelaha iyo faracyada xaqa u leh.
Soo jeedintu waxay sidoo kale qeexaysaa in doorashooyinka lagu maamulo laba heer oo kala ah Guddiga Hirgelinta Doorashooyinka Federaalka (FEIC) iyo Guddiyada Hirgelinta Doorashooyinka Dowlad-goboleedyada (SEICs).
